Concatedral Basílica de Santa María

A Concatedral de Vigo, coñecida popularmente como A Colexiata, é un dos mellores exemplos da arquitectura relixiosa da cidade; expoñente da arte neoclásica en Galicia, é considerada como o templo máis importante da cidade e está situada no interior do seu centro histórico. A historia di que foi erixida en 1811 sobre outra igrexa anterior, de estilo gótico (ss. XV-XIX). O templo, cuxa construción foi encargada a Melchor de Prado y Marino, é de planta basilical con tres naves, ten unha fachada de ornamentación clásica e conta cunha torre-campanario de 57 metros de altura. Na súa parte dereita destaca o Reloxo de Sol que, sorprendentemente, non está orientado ao sur, como era habitual, o que o converte nunha peza singular.

A Igrexa de Santa María acolle a imaxe do Cristo da Victoria, sen dúbida o emblema relixioso máis importante de Vigo, que sae en procesión todos os anos o primeiro domingo de agosto, convocando a decenas de miles de fieis e, ademais, inaugura a Semana Grande, a festa tradicional máis importante de Vigo.

Diante da Concatedral de Santa María, había noutro tempo unha oliveira que deu orixe á denominación de «cidade olívica» e que, segundo a lenda, plantaron os cabaleiros-monxes Templarios, pero que acabou desaparecendo por mor dun incendio; del obtívose unha rama da que máis tarde crecería o exemplar situado no Paseo de Alfonso.