O vindeiro domingo 18 de maio, a praza do Berbés de Vigo acollerá a XLIII Festa dos Maios, organizada pola Asociación Veciñal e Cultural do Casco Vello da cidade olívica.
A xornada festiva dará comezo ás 11:30 horas cun obradoiro de costura con flores, no que as persoas asistentes poderán achegarse a esta arte tradicional dun xeito creativo e primaveral. Ás 12:30 horas, os máis pequenos serán protagonistas nun obradoiro infantil de debuxo, pensado para fomentar a súa imaxinación e conexión coa natureza.
Xa pola tarde, ás 17:00 horas, comezarán as actuacións co grupo As Perseidas do Berbés. Ás 17:30 horas será a quenda da Banda de Gaitas do Casco Vello, que encherá a praza de música tradicional.
A continuación, ás 18:00 horas, procederase á entrega de premios do Concurso de Fotografía da Reconquista, recoñecendo os mellores traballos presentados nesta edición. O momento central da celebración chegará ás 18:15 horas coa representación dramatizada dos Maios, unha posta en escena que recupera esta tradición popular cunha mirada artística e comunitaria.
Para poñer o ramo á festa, ás 19:00 horas actuará o grupo Millaxeira, e ás 19:30 horas será o grupo Carunchos quen peche esta edición da Festa dos Maios cun concerto cheo de ritmo e identidade galega.