- This event has passed.
Festa da Ostra (Arcade)
Abril 5 - Abril 7
XXXVI FESTA DA OSTRA
A estrela desta festa será, como cada ano, a ostra ao natural.
Pero este ano tamén contaremos cos Tres, a desgustar nesta orde:
- Ostra de mar e montaña sobre unha crema carbonara ibérica.
- Ostra adobada en teriyaki sobre crema de aguacate e caviar de arenque e ovas de salmón.
- Ostra en escabeche tradicional.
Uns pratos cociñados polo Calidus Catering, unha empresa que lidera o veciño de Soutomaior Joaquín Lema. O prezo da ración (unha ducia) da ostra ao natural será de 10 € e da gastroexperiencia dos Tres tamén será o mesmo, 10 € para degustar a ostra cociñada con eses tres preparados. Todo refogado cos mellores albariños do concello: o Noelia Bebelia, María Vinyals, Pedro Madruga e Quinta das Eiras (12 € a botella). As casetas da festa abrirán o sábado, 6 de abril, a partir das 12:00 h. e ofrecerán ostras ao natural e un adianto dos Tres. O domingo, as casetas abrirán ás 11:00 h. e ofrecerán a ostra ao natural e a gastroexperiencia dos Tres ao longo de toda a xornada.
Programación por horas
Venres, 5 de abril
12:00 h A Casa do Concello vístese de gala para entregar o Galardón á Ostreira Isabel Seoane Amoedo.
20:00 h A música da charanga A cabeza non para encherá de alegría as rúas desde o centro urbano ata o peirao.
22:30 h A noite ilumínase cunha Verbena popular ao son das orquestras Marbella e Orixe, garantizando diversión ata altas horas.
Sábado, 6 de abril
11:00 h A charanga Fanfarria Furruxa levará a festa desde o centro urbano ata o peirao.
12:00 h Apertura das postos de degustación
20:00 h Mekanika Rolling Band encherá de música o camiño cara ao peirao.
22:30 h A noite brilla novamente cunha Verbena popular xunto ás orquestras América de Vigo e A Fórmula.
00:00 h. Gran tirada de fogos artificiais.
Domingo, 7 de abril
10:00 h A música da Banda Artística de Arcade e a Banda Cultural de Arcade marcará o inicio do día, percorrendo desde a rúa Calvario ata o peirao.
11:00 h Unha nova oportunidade para visitar os postos de degustación e gozar dos sabores únicos da rexión.
13:00 h Non te perdas a lectura do pregón polo escritor e profesor de renome Manuel Lourenzo González, un momento de reflexión e celebración.
18:30 h Pecha con broche de ouro esta festa gastronómica coa actuación musical de Cantanascroas.
A festa da ostra…
… ou, como tamén gustan de chamala os seus apaixonados, trufa de mar, é unha homenaxe á que é considerada a “perla do marisco”, historicamente consumida e apreciada como exquisitez na ría de Vigo.
O extremo oriental da ría de Vigo é o lugar máis idóneo para o cultivo da ostra. Arcade, parroquia do municipio de Soutomaior, celebra unha festa gastronómica na súa honra a primeira fin de semana de abril de cada ano, atraendo a un elevado número de visitantes, que acoden á citada parroquia para consumir o manxar obxecto da celebración. Todo un acontecemento do abundante calendario gastronómico de Galicia.
As formas tradicionais de servir e consumir este delicioso bivalvo, sempre acompañado de viños brancos galegos (especialmente de denominación Rías Baixas) son:
- ao natural (cunhas pingas de limón)
- en escabeche
- e en empanada.
A música, así como outras actividades culturais, son o complemento perfecto do programa, renovado e replantexado anualmente, do multitudinario evento.
En canto ás propiedades deste prato mariño:
Trátase dun produto xeralmente zumarento e de sabor suave, con alto valor nutritivo debido á súa riqueza en sales minerais e vitaminas. Dise tamén que produce efectos afrodisíacos, aínda que isto xa pertence ao reino da superstición ou, se se quere, da sabedoría popular.
A ostra servida na festa de Arcade é a especie Ostrea edulis; esta variedade non é exclusiva da zona, aínda que si é verdade que a desembocadura do río Verdugo e a súa área próxima presentan as condicións ideais para a cría deste molusco, ao entrar en confluencia as augas doces procedentes do río coas salgadas da ría.
Historia
A cría e o consumo da ostra ten séculos de antigüidade. Existe coñecemento de que as culturas castrexas colleitaban xa este bivalvo, e o seu cultivo remóntase ao período romano. As dinastías dos Austrias e os Borbóns apreciaban a calidade deste egrexio activo gastronómico, que se transportaba á Corte do Reino en escabeche dentro de pequenos barrís de madeira. No século XIX, pasouse á comercialización deste produto en Europa.
O consumo da ostra erixiuse en festa en 1987 por iniciativa do sector marisqueiro de Arcade dedicado á ostricultura, pioneiro no súa mercantilización e exportación. Abril é o mellor mes para a degustación, por iso se elixe este mes para a celebración desta festa. A súa talla comercial, de entre 6 e 7 centímetros, conséguese en menos de 24 meses.
A perla dos mariscos goza no centro histórico de Vigo cun lugar de culto: a Rúa Pescadería, coñecida popularmente como Rúa das Ostras, que figura, desde hai décadas, entre os encantos turísticos da cidade.
Conclusión: a ostra representa un prato típico da gastronomía galega e ten a Arcade como capital indiscutible.